پاکستان کی وفاقی وزارت صحت کے مطابق ملک میں ذیابیطس کے مریضوں کی تعداد میں اضافہ ہو رہا ہے۔
جمعہ کو قومی اسمبلی میں پیش کیے گئے ایک تحریری بیان میں بتایا گیا کہ اس مرض پر قابو پانے کے لیے لوگوں کو تیزی سے رونما ہونے والی ثقافتی اور سماجی تبدیلوں، شہری آبادی میں اضافے، غذائیت کی تبدیلیوں، طبی سہولتوں اور غیر صحت مندانہ طرز زندگی سے متعلق اقدامات کے بارے میں معلومات فراہم کی جا رہی ہیں۔
بیان میں کہا گیا ہے کہ وفاقی حکومت کے تمام ہسپتالوں میں ذیابیطس کا مکمل علاج فراہم کیا جاتا ہے جہاں ماہرین غذائیت کی سہولیات بھی موجود ہیں جو اس مرض کے شکار افراد کو غذا سے متعلق معاونت فراہم کرتے ہیں۔
وزارت صحت کے مطابق سرکاری سطح کے علاوہ نجی شعبے اور غیر سرکاری تنظیموں کی مدد سے بھی ہسپتالوں میں ذیابیطس کے بارے میں سیمیناروں اور کانفرنسوں کے ذریعے اس مرض سے متعلق آگاہی پھیلائی جا رہی ہے۔
VOA