| واشنگٹن …امریکی میڈیا میں شائع ہونیوالی رپورٹ کے مطابق امریکا نے پاکستان کو دھمکی دی ہے کہ اگرآج ریمنڈ ڈیوس کو رہا نہ کیا گیا تو پاکستان کے ساتھ سفارتی تعلقات ختم کردیئے جائیں گے۔ اے بی سی نیوز کی پاکستانی حکام کے حوالے سے رپورٹ کے مطابق امریکا میں تعینات پاکستانی سفیر حسین احمد حقانی کو پیرکی شام دوبار ہ وائٹ ہاؤس طلب کیا گیا، جہاں امریکی صدر کے مشیر برائے قومی سلامتی ٹام ڈونیلن نے انہیں صدر اوباما کا دھمکی آمیز پیغام دیا کہ اگرجمعہ تک ریمنڈ ڈیوس کو رہا نہ کیا گیا تو سفارتی تعلقات منقطع اور پاکستانی صدر کا دورہ امریکا منسوخ کر دیا جائیگا،پاکستانی سفیر کو امریکابدر کردیا جائیگا، پاکستان میں امریکی قونصلیٹ بند کردیئے جائینگے۔اے بی سی نیوز کے مطابق امریکی حکام نے آف دی ریکارڈ ان اطلاعات کی تصدیق کی ہے، تاہم وائٹ ہاؤس کے ترجمان نے کسی بھی تبصرے سے انکار کردیا ہے۔ دوسری جانب حسین حقانی نے سوشل نیٹ ورکنگ ویب سائٹ پر اپنے پیغام ان اطلاعات کی تردید کرتے ہوئے لکھا ہے کہ امریکا نے کوئی دھمکی نہیں دی۔ادھر سفارتی ذرائع کے مطابق صدر زرداری کا امریکا کا دورہ منسوخ کردیا گیا۔
بشکریہ جنگ |
